Një aksident i rëndë trafiku me pasojë vdekjen ka ndodhur në orët e para të së dielës në qytetin e Gjakovës. Lajmi u konfirmua nga zëdhënësja e Policisë së Kosovës për rajonin e Gjakovës, Vlera Krasniqi.
Sipas njoftimit zyrtar, aksidenti ka ndodhur rreth orës 02:00 në rrugën “Tirana”, ku janë përfshirë një veturë dhe një motoçikletë. Si pasojë e përplasjes, drejtuesi i motoçikletës ka pësuar lëndime të rënda trupore, të cilave nuk ka mundur t’u mbijetojë.
Në koordinim të plotë me Prokurorin e Shtetit, trupi i pajetë i viktimës është dërguar për ekzaminim mjeko-ligjor. Ndërkaq, ndaj drejtuesit të veturës është caktuar masa e ndalimit policor prej 48 orësh, për të mundësuar zhvillimin e procedurave të mëtejshme hetimore.
Lidhur me rrethanat e ngjarjes, drejtori rajonal i Policisë së Trafikut në Gjakovë, Albin Sahatqija, ka deklaruar se dyshohet që shkak i aksidentit të ketë qenë mospërshtatja e shpejtësisë me kushtet e rrugës. Sipas hetimeve paraprake, motoçiklisti dyshohet se ka humbur kontrollin mbi mjetin dhe është përplasur me trotuarin.