Një aksident i rëndë rrugor ndodhi ditën e sotme në aksin Kashar-Tiranë, ku një autobus i linjës Berat-Tiranë doli nga rruga dhe u përmbys. Si pasojë e kësaj përplasjeje, ka humbur jetën drejtuesi i mjetit, ndërsa 13 persona të tjerë kanë mbetur të lënduar dhe ndodhen nën kujdesin mjekësor.
Pas ngjarjes, kanë reaguar zyrtarë të lartë të shtetit. Ministri i Brendshëm, Besfort Lamallari, shprehu tronditjen për aksidentin fatal dhe u shprehu ngushëllimet më të ndjera familjes Hasimi për humbjen e të afërmit të tyre. Ai konfirmoi se Policia e Shtetit ka mbërritur menjëherë në vendngjarje dhe po punon për zbardhjen e plotë të shkaqeve të aksidentit.
Nga ana tjetër, Zëvendëskryeministrja Albana Koçiu shprehu solidaritetin me të prekurit nga kjo tragjedi përmes një reagimi në rrjetet sociale, duke u uruar shërim të shpejtë personave të lënduar. Ministri Lamallari u bëri gjithashtu thirrje të gjithë drejtuesve të mjeteve për të respektuar rregullat e qarkullimit rrugor, duke theksuar se ato janë garancia më e rëndësishme për sigurinë e jetës në rrugë.