Seanca plenare në Kuvendin e Shqipërisë është ndërprerë përkohësisht këtë të hënë, pas lajmeve për një aksident të rëndë rrugor të ndodhur në autostradën Tiranë-Durrës, pranë Qendrës Tregtare Univers.
Kërkesa për ndërprerjen e seancës për 5 minuta u bë nga kryetari i Grupit Parlamentar të Partisë Socialiste, Taulant Balla. Ai kërkoi kohë që deputetët të informoheshin mbi ngjarjen dhe gjendjen e të lënduarve. Drejtuesi i seancës miratoi kërkesën, duke pezulluar përkohësisht punimet.
Sipas të dhënave të deritanishme, një minibus i linjës Berat-Tiranë ka dalë nga rruga dhe është përmbysur. Si pasojë, raportohet për humbjen e jetës së 2 personave dhe plagosjen e 17 të tjerëve. Në vendin e ngjarjes kanë mbërritur menjëherë forcat e Policisë së Shtetit, ekipet zjarrfikëse dhe autoambulancat, të cilat po vijojnë operacionin për nxjerrjen e pasagjerëve nga mjeti dhe transportimin e të lënduarve drejt institucioneve shëndetësore.