Një aksident rrugor me pasojë vdekjen ka ndodhur mbrëmjen e së enjtes në fshatin Delisufaj të Lushnjës. Automjeti me të cilin udhëtonin dy motrat, Mirela Hasko dhe Florije Xhepa, ka dalë nga rruga dhe ka përfunduar në një kanal vaditës, pasi nuk ka arritur të futet në urë. Sipas njoftimit zyrtar të Policisë së Shtetit, ngjarja është raportuar rreth orës 19:00 në aksin rrugor rural "Delisufaj-Çukas".
Sipas të dhënave zyrtare, mjeti drejtohej nga Florije Xhepa, 53 vjeçe, banuese në fshatin Çermë, ndërsa pasagjere ishte motra e saj, Mirela Hasko, 50 vjeçe, banuese në fshatin Delisufaj. Kanali ka qenë i mbushur me ujë dhe rrjedha e ka zhvendosur mjetin poshtë urës, duke e bërë të pamundur daljen e viktimave nga automjeti, të cilat gjetën vdekjen nga mbytja.
Pas mbërritjes së shërbimeve të emergjencës dhe Zjarrfikëses, trupat e pajetë janë nxjerrë nga mjeti dhe janë transportuar drejt morgut të spitalit të Lushnjës. Grupi hetimor ndodhet në vendngjarje dhe po kryen veprimet e nevojshme për zbardhjen e plotë të shkaqeve dhe rrethanave të këtij aksidenti.
Përditësime
Policia saktësoi identitetin e viktimave, duke konfirmuar se ato janë Mirel Haskaj, 48 vjeçe, dhe Florije Xhepa, 50 vjeçe. Burimet zyrtare sqaruan se viktima Mirel Haskaj ka qenë e martuar, duke korrigjuar të dhënat e raportuara më herët mbi moshën dhe gjendjen civile të tyre.