Një aksident i rëndë automobilistik ka ndodhur gjatë ditës së sotme në aksin rrugor Lurë–Rrëshen, në fshatin Kurbnesh të bashkisë Mirditë. Automjeti, në të cilin udhëtonin tre të rinj, ka dalë nga rruga dhe ka rënë në një greminë të thellë, pas humbjes së kontrollit nga drejtuesi i mjetit.
Sipas njoftimit zyrtar të Policisë së Shtetit, viktimë e aksidentit ka mbetur shtetasi Claudio Ndoj, rreth 20 vjeç. Drejtuesi i automjetit, i identifikuar si Arli Kacorri, po ashtu rreth 20 vjeç, si dhe një pasagjer tjetër i mitur, rreth 15 vjeç, kanë mbetur të plagosur rëndë. Për shkak të terrenit të thyer dhe vështirësive në vendngjarje, për nxjerrjen e personave është dashur ndërhyrja e shërbimeve të emergjencës dhe zjarrfikësve.
Të dy të plagosurit janë evakuuar me helikopter dhe janë dërguar për trajtim të specializuar mjekësor në Spitalin e Traumës në Tiranë. Grupi hetimor ndodhet në vendngjarje dhe, nën drejtimin e Prokurorisë, po kryen të gjitha veprimet procedurale për dokumentimin e plotë të rrethanave dhe shkaqeve që çuan në këtë ngjarje tragjike.
Përditësime
Hetuesit e çështjes kanë fokusuar dyshimet paraprake mbi shpejtësinë tej normave të lejuara si shkaktar kryesor i aksidentit. Policia konfirmoi se viktima, 20-vjeçari Claudio Ndoj, udhëtonte si pasagjer në automjet. Autoritetet mbërritën në vendngjarje pasi një drejtues mjeti tjetër, që po kalonte në atë aks, vuri re makinën në greminë dhe njoftoi menjëherë shërbimet e emergjencës.
Grupi hetimor konfirmoi se automjeti i përfshirë në aksident është model BMW. Hetimet në vendngjarje nxorrën në pah se aksi rrugor është ende në proces ndërtimi, ndërsa mungesa e barrierave mbrojtëse ka ndikuar në pasojat e rënda të ngjarjes. Burime mjekësore nga Spitali i Traumës raportuan përmirësim të gjendjes shëndetësore për dy të plagosurit, të cilët kanë dalë nga reanimacioni dhe ndodhen jashtë rrezikut për jetën.