Aksidenti rrugor ka ndodhur në aksin Bulqizë-Klos, ku dy automjete janë përplasur me njëra-tjetrën. Si pasojë e përplasjes ka humbur jetën pasagjeri Hali Gjashi, 50 vjeç, i cili udhëtonte në një automjet tip Hyundai.
Sipas informacioneve paraprake, shtatë personat e tjerë të përfshirë në ngjarje, përfshirë dy drejtuesit e mjeteve me iniciale Xh. S. dhe S. C., kanë marrë plagë dhe ndodhen jashtë rrezikut për jetën. Trajtimi mjekësor është ndarë në dy institucione:
• 3 persona janë transportuar për ndihmë më të specializuar në Spitalin e Traumës në Tiranë.
• 4 persona po marrin ndihmën e nevojshme në spitalin e Bulqizës.
Autoritetet policore kanë mbërritur në vendin e ngjarjes për të nisur hetimet zyrtare. Grupi hetimor po punon për zbardhjen e plotë të rrethanave dhe shkaqeve që çuan në këtë përplasje. Sipas raportimeve, viktimat dhe të plagosurit po ktheheshin nga një ceremoni mortore në momentin kur automjetet e tyre u përfshinë në aksident.
Përditësime
Policia e Dibrës ka shoqëruar drejtuesin e mjetit Xhoni Sallaku, në kuadër të hetimeve për aksidentin fatal të ndodhur në Rrugën e Arbrit, në segmentin Bulqizë-Klos. Sipas të dhënave paraprake, aksidenti ndodhi pasi automjeti i drejtuar nga Sallaku goditi nga pas një tjetër mjet, duke shkaktuar përplasjen fatale kokë më kokë me makinën e drejtuar nga Sajmir Cecja. Nga ngjarja ka humbur jetën një 60-vjeçar, ndërsa shtatë persona të tjerë kanë mbetur të plagosur. Kryeprokurori i Dibrës ka mbërritur në vendngjarje për të mbikëqyrur procedurat hetimore.