Një ngjarje e rëndë ka ndodhur më 8 shtator 2026, në afërsi të fshatit Bujan, në rrugën e Dobravës, ku katër punonjës të Bashkisë Tropojë pësuan goditje elektrike gjatë punës në terren. Sipas njoftimit zyrtar të Policisë së Shtetit, punonjësit ishin duke kryer transportin dhe vendosjen fizike të shtyllave të ndriçimit publik, sipas planit të punës së Drejtorisë së Turizmit, Shërbimeve Publike dhe Transportit.
Nga veprimet paraprake dyshohet se, gjatë vendosjes së një shtylle në bazament, për shkak të peshës së saj, katër punonjësit kanë humbur ekuilibrin dhe shtylla ka prekur telat e rrymës elektrike të tensionit të mesëm, duke përcjellë energjinë te punonjësit. Si pasojë e kontaktit, shtetasi Muhamet Sylisufaj (59 vjeç) ka ndërruar jetë, ndërsa tre punonjësit e tjerë, të identifikuar si Albert Dunisha (40 vjeç), Ilir Dautaj (47 vjeç) dhe Afrim Aliaj (21 vjeç), janë transportuar në Spitalin e Bajram Currit për ndihmë mjekësore.
Burime nga Bashkia Tropojë sqarojnë se ndriçimi rrugor që po instalohej ishte i pajisur me panele fotovoltaike dhe nuk duhej të kishte lidhje me linjat ekzistuese elektrike. Grupi hetimor ndodhet në vendngjarje për të zbardhur dinamikën e incidentit dhe për të përcaktuar nëse janë respektuar rregullat e sigurisë në punë.
Përditësime
Autoritetet saktësuan se incidenti ndodhi rreth orës 10:00 në afërsi të fshatit Bujan. Punonjësit ishin angazhuar në planin e punës së Bashkisë Tropojë të datës 04.09.2026. Identiteti i viktimës u konfirmua zyrtarisht si Muhamet Sylisufaj.
Policia e Tropojës ndaloi dy zyrtarë në lidhje me aksidentin në rrugën e Dobravës, pranë fshatit Bujan. Të ndaluarit janë N. Gj., Drejtor i Drejtorisë së Turizmit, Shërbimeve Publike dhe Transportit, dhe G. H., Drejtues Teknik i punimeve. Ata akuzohen për veprën penale 'Shkelja e rregullave të mbrojtjes në punë'. Mjekët konfirmuan se tre punonjësit e lënduar janë jashtë rrezikut për jetën.