Një aksident rrugor me përmasa të mëdha është regjistruar pasditen e së martës në qytetin e Antibes në Francë. Një kamion ka dalë jashtë kontrollit duke u përplasur me 23 automjete, duke shkaktuar dëme të konsiderueshme materiale.
Nga ky incident kanë mbetur të plagosur 37 persona, mes të cilëve edhe tre efektivë të policisë që ndodheshin në vendngjarje. Sipas informacioneve të raportuara nga mediat, shkaku i aksidentit dyshohet të ketë qenë gjendja e përgjumjes së shoferit të kamionit gjatë kohës që po drejtonte mjetin.
Forcat e rendit kanë ndërhyrë menjëherë duke arrestuar drejtuesin e kamionit. Në operacionin e shpëtimit janë angazhuar 40 zjarrfikës me 18 automjete të posaçme, së bashku me ekipe të policisë dhe ambulancës, të cilët kanë punuar për nxjerrjen e personave që kishin mbetur të bllokuar brenda automjeteve të dëmtuara. Autoritetet nuk kanë njoftuar për asnjë viktimë si pasojë e kësaj përplasjeje.