Një aksident trafiku me përfshirjen e gjashtë automjeteve ka ndodhur mëngjesin e së shtunës, rreth orës 08:10, në segmentin e autostradës “Ibrahim Rugova”, në afërsi të pikës kufitare në Vërmicë. Sipas njoftimit zyrtar nga Policia e Kosovës, nga përplasja kanë mbetur të lënduar tetë persona, të cilët janë transportuar për në Spitalin Rajonal të Prizrenit për marrjen e ndihmës mjekësore.
Në mesin e të lënduarve janë raportuar edhe një fëmijë dhe një grua shtatzënë. Autoritetet shëndetësore nuk kanë dhënë ende detaje mbi gjendjen shëndetësore të të lënduarve, ndërsa nuk raportohet për viktima.
Si pasojë e kësaj përplasjeje, njëra korsi e autostradës në drejtimin Prizren–Morinë mbeti e bllokuar përkohësisht, duke sjellë vonesa dhe krijimin e kolonave të gjata të automjeteve. Njësitë e Policisë së Kosovës dhe ekipet e emergjencës kanë dalë në vendin e ngjarjes për të menaxhuar trafikun dhe për të kryer hetimet e nevojshme për zbardhjen e shkaqeve të aksidentit. Qendra Kombëtare për Menaxhim Kufitar u ka bërë thirrje drejtuesve të mjeteve të shfrytëzojnë pika të tjera kufitare si alternativë për shkak të ngarkesës në këtë segment rrugor.
Përditësime
Shtatë nga tetë personat e lënduar në aksidentin zinxhir në autostradën Ibrahim Rugova janë liruar nga spitali pas ekzaminimeve mjekësore, konfirmoi Hekuran Veçgishti, shef i Emergjencës në Prizren. Policia e Kosovës është njoftuar për aksidentin në orën 08:10.