Dita e sotme është shënuar nga disa aksidente rrugore në rrugët magjistrale të rajonit. Në orët e para, në fshatin Hereq në rrugën Gjakovë–Deçan, u raportua një aksident ku u përfshinë dy automjete. Sipas zëdhënësit të Policisë së Kosovës për rajonin e Gjakovës, Sheremet Elezaj, ngjarja ka ndodhur rreth orës 12:10 dhe për pasojë një person ka kërkuar ndihmë mjekësore.
Në një tjetër zhvillim, në fshatin Landovicë në magjistralen Prizren–Gjakovë, u përplasën tri automjete. Zëdhënësi i policisë për rajonin e Prizrenit, Shaqir Bytyqi, konfirmoi se aksidenti ndodhi rreth orës 13:00, duke shkaktuar dëme materiale dhe duke lënë të paktën një person të lënduar.
Gjatë pasdites, një aksident i tretë u regjistrua në fshatin Mrasor, në rrugën magjistrale Gjakovë–Klinë. Zëdhënësja e policisë për rajonin e Gjakovës, Vlera Krasniqi, njoftoi se ngjarja ndodhi rreth orës 18:30 dhe në të ishin të përfshira dy automjete. Nga kjo përplasje kanë mbetur të lënduar shtatë persona, të cilët i janë nënshtruar trajtimit mjekësor. Në të gjitha rastet, njësitë përkatëse të trafikut rrugor kanë dalë në vendin e ngjarjes dhe janë duke kryer hetimet për zbardhjen e rrethanave të aksidenteve.
Përditësime
Policia ka konfirmuar një aksident trafiku në fshatin Baballoq të Gjakovës, duke e çuar në katër numrin e përplasjeve të regjistruara sot në këtë rajon. Hetuesit e trafikut po punojnë për zbardhjen e rrethanave të rastit.
Spitali i Përgjithshëm i Gjakovës ka përditësuar bilancin e aksidentit në Mrasor, duke konfirmuar se numri i të lënduarve ka arritur në 10 persona, nga 7 sa ishte raportuar fillimisht. Pas transferimit nga Gjakova, të lënduarit po marrin trajtim të specializuar në klinikat e Qendrës Klinike Universitare të Kosovës (QKUK), përkatësisht në repartet e Ortopedisë, Kirurgjisë dhe Gjinekologjisë.
Sot, rreth orës 13:30, në fshatin Korenicë të Gjakovës, ka ndodhur një aksident trafiku në të cilin janë përfshirë disa automjete. Si pasojë, 9 persona kanë pësuar lëndime. Policia e Kosovës njoftoi se njësitet e Zjarrfikësve kanë dalë në vendin e ngjarjes për t'u ofruar ndihmë të lënduarve dhe për pastrimin e rrugës.