Një 53-vjeçar ka ndërruar jetë si pasojë e plagëve të marra në një aksident rrugor në fshatin Funarës të Bashkisë Librazhd. Viktima, Luan Çota, ndodhej si pasagjer në automjetin që doli nga rruga pasditen e së hënës dhe u përplas me pemët anës saj. Nga i njëjti aksident mbeti i plagosur edhe drejtuesi i mjetit.
Pas ngjarjes, i plagosuri u dërgua fillimisht në spitalin e Librazhdit dhe më pas në Spitalin e Traumës në Tiranë, ku pavarësisht përpjekjeve të mjekëve, ai nuk mundi të mbijetojë. Sipas hetimeve paraprake, drejtuesi i automjetit, Besnik Laçku, dyshohet se ka lëvizur me shpejtësi dhe ka humbur kontrollin mbi mjetin.
Pas verifikimeve, policia konfirmoi se Besnik Laçku ishte në gjendje të rënduar nga alkooli. Për këtë arsye, ai është ndaluar nga uniformat blu dhe ndaj tij kanë nisur procedurat ligjore për shkelje të rregullave të qarkullimit rrugor. Burime bëjnë me dije se viktima, Luan Çota, kishte qenë i përfshirë në një tjetër aksident rrugor rreth tre muaj më parë, ku kishte pësuar fraktura në këmbë. Autoritetet vijojnë hetimet për zbardhjen e plotë të dinamikës së ngjarjes.