Aktakuzë ndaj Artan Grubit për Lotarinë Shtetërore

Prokuroria Themelore Publike në Shkup ka zyrtarizuar ngritjen e aktakuzës ndaj tetë personave për veprën penale “Keqpërdorim i pozitës dhe autorizimit zyrtar”. Sipas hetimeve, të akuzuarit gjatë viteve 2023 dhe 2024 kanë tejkaluar autorizimet e tyre për të organizuar në mënyrë të pavarur lojëra elektronike të fatit, duke dëmtuar rëndë shoqërinë aksionare “Lotaria Shtetërore e Republikës së Maqedonisë së Veriut”.

Nga hetimet rezulton se Lotaria Shtetërore nuk kishte të drejtë të organizonte lojëra të tilla, pasi kjo e drejtë ishte investuar që në vitin 2013 si kontribut jomonetar në shoqërinë “KASINOS AUSTRIA” SHPK, ku shteti zotëron 51% të kapitalit. Përkundër kësaj, ish-drejtori Përparim Bajrami kishte nxitur procedurën përmes një informacioni drejtuar ish-sekretarit të Qeverisë, Metodija Dimovski, i cili më pas e propozoi atë në seancën qeveritare. Prokuroria pretendon se ish-zëvendëskryeministri Artan Grubi ka pasur ndikim vendimtar në miratimin e këtij vendimi, duke kryesuar seancën edhe pse ishte në dijeni të shkeljeve ligjore.

Pas miratimit të këtij vendimi, Bordi Mbikëqyrës i Lotarisë Shtetërore aprovoi procedurën e prokurimit publik për terminalet e videolotarisë, duke ngarkuar buxhetin e shoqërisë me detyrime të mëdha financiare.

Masat ndaj të akuzuarve

Prokuroria ka kërkuar masa shtrënguese për të gjithë të përfshirët:
• Përparim Bajrami: Është kërkuar paraburgim prej 30 ditësh, pasi ndodhet në arrati prej gati një viti.
• Artan Grubi: Është kërkuar vazhdimi i arrestit shtëpiak.
• Personat e tjerë: Për gjashtë të akuzuarit e mbetur janë propozuar masa të tjera kujdesi.

Gjykata Themelore Penale Shkup ka njoftuar se lënda i është ndarë një gjyqtari dhe seancat e shqyrtimit pritet të nisin më 24 gusht 2026.