Departamenti i Krimeve të Rënda në Prokurorinë Themelore në Prizren ka ngritur aktakuzë ndaj dy të pandehurve, F.G. dhe N.G., për veprën penale "Kultivimi i bimës së hashashit, shkurres së kokainës ose bimëve të kanabisit", kryer në bashkëkryerje. Ndaj të pandehurit N.G. është ngritur gjithashtu akuzë për "Mbajtje në pronësi, kontroll ose posedim të paautorizuar të armëve".
Sipas aktakuzës, çështja rrjedh nga një kontroll i realizuar më 9 tetor 2025 në Prizren, ku organet e rendit gjetën dhe sekuestruan bimë të kanabisit në pronën e të pandehurve. Ekspertiza forenzike e kryer mbi provat ka konfirmuar praninë e substancës narkotike kanabis-marihuanë.
Krahas bimëve, autoritetet kanë sekuestruar shumën prej 19,900 eurosh, e cila dyshohet se është përfituar nga aktiviteti i paligjshëm. Gjatë kontrollit të ushtruar në automjetin e të pandehurit N.G., policia konfiskoi 65 fishekë, të cilët mbaheshin në kundërshtim me legjislacionin për armët.
Prokurori i çështjes i ka propozuar Gjykatës Themelore në Prizren që, pas shqyrtimit gjyqësor dhe administrimit të provave, të pandehurit të shpallen fajtorë dhe të dënohen në përputhje me dispozitat e Kodit Penal të Republikës së Kosovës.
Përditësime
Prokuroria Themelore në Prizren ka ngritur aktakuzë ndaj dy personave për veprën penale 'Kultivimi i bimëve narkotike', në bashkëkryerje, të parashikuar nga neni 172, paragrafi 1, lidhur me nenin 31 të Kodit Penal të Republikës së Kosovës.