Prokuroria Themelore në Prizren ka parashtruar kërkesë për caktimin e masës së paraburgimit ndaj F.N. (Fazli Ndrecaj), 46-vjeçar nga fshati Maqitevë i Komunës së Suharekës. I dyshuari, i cili ishte në kërkim nga organet e rendit, u dorëzua vetë në Policinë e Kosovës më 28 mars 2026 dhe ndodhet në ndalim 48-orësh.
Rasti lidhet me një aksion të zhvilluar më 16 shtator 2025 nga Prokuroria Themelore në Prizren në bashkëpunim me Policinë e Kosovës. Gjatë këtij operacioni, në një shtallë në fshatin Maqitevë u zbulua dhe sekuestrua një sasi e madhe e substancës narkotike marihuanë (kanabis sativa), saktësisht 512 kilogramë, në faza të ndryshme të përpunimit dhe tharjes.
Gjithashtu u sekuestruan:
- një granatëhedhës (mortajë);
- një raketë krahu;
- një pushkë gjuetie dhe fishekë;
- një traktor me rimorkio;
- pajisje dhe vegla pune për kultivim dhe përpunim;
- dy telefona celularë;
- prova të tjera materiale.
Prokuroria lëshoi urdhër të përkohshëm për sekuestrimin dhe ngrirjen e dy parcelave tokësore në Maqitevë, me sipërfaqe 1963 m² dhe 1438 m².
Sipas dyshimeve, i pandehuri kishte kultivuar pa autorizim bimën kanabis sativa në pjesën malore të fshatit Maqitevë, me qëllim prodhimin, përpunimin për shitje dhe shpërndarjen e narkotikëve në treg. Me këto veprime, ai akuzohet për tri vepra penale sipas Kodit Penal të Republikës së Kosovës:
- kultivimi i bimëve të kanabisit (neni 272);
- blerja, posedimi, shpërndarja dhe shitja e paautorizuar e narkotikëve (neni 267);
- mbajtja në pronësi, kontroll ose posedim të paautorizuar të armëve.