Prokuroria Speciale e Republikës së Kosovës ka dorëzuar aktakuzë në Gjykatën Themelore në Prishtinë ndaj A.I., B.M. dhe F.U. për vepra penale që lidhen me narkotikët dhe armëmbajtjen pa leje.
Sipas aktakuzës, më 22 prill 2025, rreth orës 15:00, në Prishtinë, të pandehurit, duke vepruar në bashkëkryerje dhe pas koordinimit paraprak, dyshohet se shitën pa autorizim 1 kilogram kokainë, në vlerë prej 27 mijë eurosh. Gjatë kontrolleve policore u sekuestruan gjithsej 4 kilogramë e 955.62 gramë kokainë, si dhe pajisje për paketimin e narkotikëve.
Aktakuza i ngarkon të tre personat me blerje, posedim, shpërndarje dhe shitje të paautorizuar të narkotikëve, substancave psikotrope dhe analoge. B.M. dhe F.U. akuzohen gjithashtu për mbajtje, kontroll ose posedim të paautorizuar të armëve.
Sipas aktakuzës, nga një datë e papërcaktuar deri më 22 prill 2025, në Prishtinë, B.M. dhe F.U. kanë mbajtur në pronësi dhe nën kontroll pistoleta, në kundërshtim me Ligjin për Armët.
Prokuroria Speciale i ka propozuar gjykatës konfiskimin e pasurisë ndaj së cilës është nxjerrë urdhër ndalues përfundimtar, në përputhje me dispozitat përkatëse të Kodit të Procedurës Penale të Republikës së Kosovës.
Të tre personat konsiderohen të pafajshëm derisa fajësia e tyre të vërtetohet me vendim të formës së prerë.