Një operacion i koordinuar nga Prokuroria Themelore në Prishtinë, Policia e Kosovës dhe Agjencia e Kosovës për Inteligjencë (AKI) ka rezultuar në sekuestrimin e rreth 60 kilogramëve marihuanë dhe arrestimin e katër personave. Aksioni është zhvilluar pas hetimeve disa mujore dhe zbatimit të masave të veçanta hetimore në dy lokacione kryesore: në Komunën e Prishtinës dhe në fshatin Babush të Komunës së Ferizajt.
Të arrestuarit janë:
• Një shtetas i Republikës së Kosovës;
• Dy shtetas të Republikës së Serbisë;
• Një shtetas i Republikës së Shqipërisë.
Gjatë këtij operacioni policor, përveç substancës narkotike, janë sekuestruar edhe dy vetura dhe një kamion, të cilat dyshohet se janë përdorur për veprimtari të kundërligjshme. Me urdhër të Prokurorit të Shtetit, ndaj të dyshuarve është caktuar masa e ndalimit prej 48 orësh.
Të dyshuarit akuzohen për kryerjen e veprës penale “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge”. Prokuroria Themelore në Prishtinë ka konfirmuar se do të paraqesë kërkesë për caktimin e masës për sigurimin e prezencës së të pandehurve në procedurën penale brenda afateve ligjore.