Prokuroria Themelore në Prishtinë, në bashkëpunim me Policinë e Kosovës, ka konfiskuar mbi 76 kilogramë substancë narkotike të llojit marihuanë dhe ka ndaluar tre të dyshuar në kuadër të operacionit të koduar “Bregdeti”. Rasti ka qenë nën hetim për disa muaj, ndërsa zhvillimet kryesore ndodhën më 21 dhe 22 janar 2026.
Më 21 janar 2026, rreth orës 23:00, pranë pikëkalimit kufitar në Merdarë, u ndalua i dyshuari H. S., i cili drejtonte një kamion me targa vendore. Gjatë kontrollit në kamion u gjetën 68 paketime me marihuanë, me peshë totale 76 kilogramë e 800 gramë.
Po në të njëjtën ditë u krye kontrolli në shtëpinë e të dyshuarit H. S., ku u sekuestruan:
- 1 armë zjarri me 5 fishekë të kalibrit 9.9 mm;
- 2 vetura;
- 1 kamion;
- 1 telefon celular;
- 2.950 euro para të gatshme.
Më 22 janar 2026 u bastisën dy shtëpi të të dyshuarve të tjerë meshkuj kosovarë në fshatin Godishnjak të Podujevës. Gjatë këtyre kontrolleve u gjetën:
- 4 paketime me marihuanë, me peshë 4 kilogramë e 454 gramë;
- 2 vetura;
- 2 telefona celularë;
- thasë najloni të zbrazur ngjyrë të zezë dhe ngjitës për paketimin e narkotikëve;
- 1 armë zjarri me gaz e modelit Sig Sauer.
Me urdhër të prokurorit, tre të dyshuarit u ndaluan për 48 orë. Prokuroria njoftoi se do të vazhdojë hetimet e mëtejme në përputhje me ligjin.
Përditësime
Policia e Kosovës ka konfirmuar zyrtarisht konfiskimin e mbi 80 kg marihuanë në total.
Ky operacion lidhet me aksionin e shtatorit të vitit të kaluar, kur u arrestuan 7 persona për trafik narkotikësh dhe pastrim parash, në bashkëpunim me Belgjikën, Francën, Holandën dhe Europol.
Policia sekuestroi rreth 7 kg marihuanë në një veturë me targa të huaja në Merdarë dhe arrestoi një shtetas kosovar të dyshuar.
Gjatë kontrollit në shtëpinë e tij në Prizren, autoritetet gjetën dhe sekuestruan:
- 7 kg marihuanë në 24 paketime;
- 4 vetura;
- 1 telefon;
- qese plastike, rollne, aparate vakuum dhe 2 peshore digjitale.