Gjatë një operacioni të përbashkët të zhvilluar në Pikën e Kalimit Kufitar në Vërmicë, zyrtarët doganorë dhe policorë kanë parandaluar një rast të kontrabandimit të lëndëve narkotike. Ngjarja ka ndodhur gjatë hyrjes së një autobusi në territorin e Republikës së Kosovës, ku autoritetet kanë ndaluar automjetin për kontroll të imtësishëm të pasagjerëve dhe bagazheve të tyre.
Sipas njoftimeve zyrtare, në kuadër të planit taktik "Transporti", zyrtarët kanë selektuar për kontroll të vijës së dytë persona me potencial kriminal. Një udhëtar, shtetas i Shqipërisë, nuk deklaroi asnjë send të ndaluar gjatë intervistimit. Megjithatë, gjatë kontrollit fizik të çantës së tij të krahut, punonjësit zbuluan një qese plastike me substancë të dyshuar si narkotike. Pas peshimit, sasia e lëndës rezultoi të ishte 2.162 kilogramë marihuanë.
Pas zbulimit të rastit, autobusi u kontrollua edhe përmes skanerit, ku nuk u konstatuan parregullsi të tjera. I dyshuari u procedua nga njësitë përkatëse policore, ndërsa prokurori kompetent ka iniciuar rast për veprën penale "blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge". Ndaj personit në fjalë është vendosur masa e ndalimit prej 48 orësh.