Në pikëkalimin kufitar Merdare, zyrtarët e Doganës së Kosovës, në bashkëpunim me Policinë e Kosovës, kanë konfiskuar rreth 2 kilogramë lëndë narkotike, për të cilën dyshohet se është kokainë. Ngjarja ndodhi më 2 shkurt 2026, gjatë kontrollit të një automjeti që po hynte në territorin e Republikës së Kosovës.
Substanca ishte e fshehur në mënyrë të sofistikuar brenda automjetit. Për zbulimin e saj u krye një kontroll i thelluar, ku u përdor skaneri X-ray, donacion i Shteteve të Bashkuara të Amerikës. Kjo pajisje lehtësoi punën e zyrtarëve dhe mundësoi lokalizimin e saktë të vendit ku ishte fshehur lënda narkotike.
Bashkëpunimi u realizua me Drejtorinë për Hetimin e Trafikimit të Narkotikëve të Policisë së Kosovës. Rasti po trajtohet nga organet kompetente, ndërsa ndaj personave të përfshirë do të ndërmerren veprimet e mëtejme ligjore, në përputhje me legjislacionin në fuqi.
Dogana e Kosovës dhe Policia e Kosovës theksojnë përkushtimin e tyre në luftën kundër krimit të organizuar dhe trafikimit të narkotikëve. Kjo bëhet përmes bashkëpunimit ndërinstitucional, shkëmbimit të inteligjencës dhe përdorimit të teknologjisë moderne, për të garantuar sigurinë e qytetarëve dhe mbrojtjen e kufijve.