Zyrtarët e Doganës së Kosovës dhe të Policisë së Kosovës kanë parandaluar një tentativë për kontrabandë në pikën e kalimit kufitar në Merdare. Operacioni u realizua pas një kontrolli të detajuar, të bazuar në analizën e riskut dhe përdorimin e pajisjeve të specializuara.
Objekt i kontrollit ka qenë një mjet transportues (furgon), i cili po transportohej mbi një karrotrec dhe mbante targa të huaja. Gjatë verifikimit, autoritetet kanë gjetur substancat e dyshuara të fshehura në pjesën e sipërme të furgonit, konkretisht midis tapicerisë dhe tavanit. Sasia totale e sekuestruar është 204 copë cigare elektronike (vape), të cilat përshkruhen si produkte duhani me kanabis ose substanca të ngjashme narkotike.
Rasti është duke u trajtuar nga njësitet kompetente hetimore të Doganës dhe Policisë së Kosovës për veprime të mëtejshme ligjore. Hetimet përfshijnë gjithashtu verifikimin e mjetit transportues të përdorur në këtë tentativë kontrabande.