Operacioni policor u zhvillua në zonën kufitare të Bërnjakut, pas informatave për dyshime mbi kontrabandimin e mallrave. Gjatë kontrollit në një objekt dhe hapësirat përreth, forcat e rendit gjetën 5,550 boksa cigare të llojeve të ndryshme dhe 19 paketa shtesë, të cilat dyshohet se janë kontrabanduar.
Në të njëjtën zonë, policia lokalizoi një automjet të tipit Audi me targa të huaja, i cili ishte i palëvizshëm dhe pa drejtues, e që dyshohet se shërbente për transportin e mallrave të paligjshme. Në kuadër të të njëjtit aksion, autoritetet ndaluan edhe një kamion me targa të huaja që po transportonte materiale metalike, për të cilat drejtuesi nuk dispononte dokumentacionin e nevojshëm.
Në lidhje me këto ngjarje, një person është intervistuar nga autoritetet në cilësinë e dëshmitarit dhe më pas është liruar në procedurë të rregullt.
Sipas njoftimit zyrtar, të gjitha veprimet janë kryer në bashkëpunim me Prokurorinë Themelore në Mitrovicë. Mallrat e sekuestruara dhe dy automjetet i janë dorëzuar Doganës së Kosovës, e cila do të vazhdojë trajtimin e rastit sipas procedurave ligjore. Policia e Kosovës deklaroi se do të vazhdojë angazhimin në operacione të tilla për të parandaluar dhe luftuar kontrabandën në zonat kufitare.