Policia e Kosovës ka njoftuar për zbulimin e një rasti kontrabande mallrash pas një aksioni të përbashkët me Doganën e Kosovës më 25 mars 2026 në Prishtinë.
Njësia e Task-Forcës, e përbërë nga Drejtoria Rajonale Kufitare Jugu dhe Njësia Anti-kontrabandë e Doganës, ndërmori veprime operative pas pranimit të informacioneve për aktivitet të paligjshëm. Kështu u identifikua një lokacion që shërbente si pikë grumbulluese për mallra kontrabandë.
Kontrolli në këtë lokacion u realizua me urdhër të Prokurorit të Shtetit në Gjilan. Gjatë bastisjes u gjetën dhe sekuestruan:
- 27 000 copë filtra të ndryshëm;
- 91 kg duhan i përpunuar i gatshëm për treg;
- 700 poçe elektrike 100W.
Të gjitha mallrat e sekuestruara u dorëzuan te Dogana e Kosovës për procedurat e mëtejme ligjore. Rasti po trajtohet sipas ligjit në fuqi.