Zyrtarët e Doganës së Kosovës kanë realizuar një kontroll në një depo në periferi të Prishtinës më 27 shkurt 2026, bazuar në informata të siguruara përmes rrugëve operative. Kontrolli u zhvillua në përputhje me autorizimet nga Kodi Doganor i Republikës së Kosovës.
Gjatë veprimeve në terren u konstatua një sasi e konsiderueshme mbathjesh me marka të mbrojtura tregtare. Depoja nuk ishte e regjistruar si biznes dhe nuk posedonte dokumentacion që dëshmonte prejardhjen e mallit.
Në lidhje me rastin u njoftua Prokuroria Themelore në Prishtinë, e cila udhëzoi zyrtarët doganorë për veprimet e mëtejshme hetimore. Aktualisht, malli po sekuestrohet dhe inventarizohet, me vlerë të përafërt mbi 500 mijë euro.
Dogana e Kosovës thekson përkushtimin për luftimin e kontrabandës, mbrojtjen e ekonomisë formale, konkurrencës së ndershme dhe të drejtave të pronësisë intelektuale.