Dogana e Kosovës ka zhvilluar më 10 mars 2026 një operacion kontrolli në pesë lokacione në rajonin e Prishtinës, përkatësisht depo të bizneseve të ndryshme.
Gjatë kontrolleve, bazuar në autorizimet ligjore nga Kodi Doganor dhe i Akcizave i Republikës së Kosovës, është gjetur një sasi e konsiderueshme mbathjesh sportive me marka të mbrojtura, si dhe veshje tekstili. Malli dyshohet se nuk posedon dokumentacion përkatës për origjinën dhe zhdoganimin e rregullt në Republikën e Kosovës. Vlera e përgjithshme e mallit të sekuestruar vlerësohet rreth 800 mijë euro.
Pas evidentimit të rastit, Dogana ka njoftuar Prokurorin Kujdestar nga Prokuroria Themelore në Prishtinë, i cili ka autorizuar veprimet e mëtejme procedurale. Personat e dyshuar lidhur me pronësinë e mallit po intervistohen, ndërsa malli po inventarizohet dhe konfiskohet për t’u transportuar në depot e Doganës së Kosovës.