Njësitet anti-kontrabandë të Doganës së Kosovës, në kuadër të aktiviteteve operative për parandalimin dhe luftimin e kontrabandës, kanë realizuar kontrolle në tri lokacione të ndryshme në rajonin e Prishtinës.
Gjatë këtij operacioni, zyrtarët doganorë kanë sekuestruar gjithsej 33 mijë njësi të produkteve të duhanit të ngrohur të markës TERREA, të cilat përdoren në pajisje elektronike për ngrohjen e duhanit. Përveç produkteve, është konfiskuar edhe një pajisje elektronike që shërben për përdorimin e tyre.
Vlera e përafërt e mallit të sekuestruar llogaritet të jetë rreth 12 mijë euro. Dogana e Kosovës njoftoi se këto veprime janë ndërmarrë me qëllim mbrojtjen e tregut të ligjshëm, garantimin e konkurrencës së drejtë dhe mbrojtjen e të hyrave buxhetore. Rasti është duke u trajtuar nga autoritetet kompetente, ndërsa ndaj personave të përfshirë do të ndërmerren masat ligjore sipas legjislacionit në fuqi.