Drejtoria për Hetimin e Trafikimit me Narkotikë e Policsë së Kosovës ka finalizuar me sukses një plan taktik të koduar "KONTROLLI", pas informacioneve operative për transportimin e substancave të ndaluara. Operacioni nisi me identifikimin e dy automjeteve me targa serbe në Pikën e Kalimit Kufitar në Vërmicë.
Pas ndjekjes së operacionit, automjetet u ndaluan në dy lokacione të ndryshme: njëra në Zveçan dhe tjetra në Jarinjë. Gjatë kontrollit të detajuar të automjetit të ndaluar në Zveçan, zyrtarët policorë zbuluan hapësira të modifikuara ku ishin fshehur 25.984 kg substancë e dyshuar narkotike e llojit marihuanë. Automjeti i ndaluar në Jarinjë dyshohet se kishte rolin e përcjellësit për të siguruar rrugën.
Në lidhje me këtë rast janë arrestuar tre persona: një shtetas i Serbisë dhe dy shtetas të Malit të Zi. Në vendngjarje ka dalë Njësia e Forenzikës për të kryer procedurat e nevojshme hetimore. Policia njoftoi se veprimet e mëtejme procedurale do të ndërmerren në koordinim të plotë me organet e drejtësisë.
Përditësime
Prokuroria ka ndaluar për 48 orë tre të dyshuarit e arrestuar më 1 qershor 2026, nën dyshimin për veprën penale: blerje, posedim, shpërndarje dhe shitje e paautorizuar e narkotikëve. Organet e akuzës kanë njoftuar se do të kërkojnë caktimin e masës së paraburgimit për të përfshirët në rastin e sekuestrimit të 26 kilogramëve marihuanë.