Policia e Kosovës arrestoi dy persona dhe sekuestroi 53 kilogramë substancë që dyshohet të jetë marihuanë gjatë operacionit të koduar “MALI”, të zhvilluar më 16 tetor, rreth orës 21:40. Operacioni u krye pas hetimeve disamujore, në koordinim me Prokurorinë Themelore në Gjilan.
Gjatë aksionit u kontrolluan dy shtëpi dhe objektet përcjellëse. Sipas njoftimit të policisë, substanca u gjet në bagazhin e njërës prej veturave. Vlera e saj në tregun vendor u vlerësua rreth 80 mijë euro.
Si prova materiale u sekuestruan edhe dy telefona mobilë dhe dy automjete me targa vendore. Operacioni u mbështet nga dy ekipe të Njësisë së Reagimit të Shpejtë në Gjilan dhe nga Njësia e Forenzikës Rajonale, e cila fotografoi dhe evidentoi provat, si dhe i tërhoqi ato nga vendi i ngjarjes.
Të arrestuarit janë B.A., i lindur më 1988, dhe S.H., i lindur më 1971; të dy janë shtetas kosovarë. Ata u intervistuan në prani të avokatëve mbrojtës dhe, me vendim të prokurorit të shtetit, u ndaluan për 48 orë për procedura të mëtejshme ligjore.
Sipas policisë, të dyshuarit hetohen për dyshime lidhur me blerjen, posedimin, shpërndarjen dhe shitjen e paautorizuar të narkotikëve, si dhe për përgatitje për transportimin e lëndës jashtë vendit.