Policia e Kosovës realizoi një operacion policor kundër trafikimit të narkotikëve në rrugën Prishtinë–Prizren, në zonën e Llapushnikut. Rreth orës 12:20, njësitë e antidrogës ndaluan për kontroll një automjet me targa vendore dhe gjetën një pako që përmbante mbi 1 kg substancë të dyshuar narkotike të llojit marihuanë.
Aksioni u zhvillua në bashkëpunim të ngushtë me Prokurorinë Themelore në Ferizaj dhe Doganën e Kosovës, pas pranimit të informacionit në rrugë operative për një dërgesë të dyshuar përmes postës. Pas veprimeve hetimore dhe operative, policia identifikoi dhe ndaloi automjetin e dyshuar.
Në vendngjarje u arrestua një person i dyshuar, i cili me vendim të prokurorit kujdestar u ndalua për 48 orë. Si prova materiale u sekuestruan substanca narkotike dhe një telefon mobil.
Policia e Kosovës njoftoi se operacioni synonte goditjen e një rrjeti të dyshuar të trafikut të drogës.