Operacioni policor u zhvillua pas lokalizimit të dy automjeteve me targa vendore, të cilat dyshohej se po transportonin substanca narkotike nga Prishtina në drejtim të Mitrovicës. Gjatë tentativës për ndalimin e tyre, personat e dyshuar nuk u janë bindur urdhrave zyrtarë dhe kanë goditur zyrtarët e policisë në uniformë. Për të neutralizuar rrezikun, punonjësit e policisë kanë përdorur pajisjen zyrtare (armën e zjarrit), duke arritur më pas ndalimin e automjeteve.
Gjatë kontrollit në njërin nga automjetet, policia gjeti dhe sekuestroi rreth 3 kilogramë substancë të dyshuar narkotike të llojit marihuanë. Në kuadër të operacionit të gjerë, janë realizuar edhe tri bastisje në lokacione të ndryshme. Si prova materiale për këtë rast janë sekuestruar gjithsej:
• 0.7 gramë substancë narkotike e llojit marihuanë;
• dy automjete;
• dy telefona celularë.
Pas arrestimit dhe kryerjes së procedurave të nevojshme ligjore, me urdhër të prokurorit kompetent, personat e dyshuar janë dërguar në mbajtje për një periudhë prej 48 orësh. Rasti është duke u trajtuar nga njësitë përkatëse policore në koordinim me organet e drejtësisë.
Përditësime
Sektori Qendror për Hetimin e Narkotikëve (SQHN) ka udhëhequr operacionin për kapjen e substancave narkotike. Hetimet konfirmuan se dy automjetet e përfshira, të cilat mbanin targa vendore, po transportonin drogën nga Prishtina drejt Mitrovicës.