Prokuroria Themelore në Pejë, Departamenti i Përgjithshëm, ka ngritur aktakuzë ndaj personit fizik Sh.K., pronar i kompanisë Luani Transport, dhe ndaj kësaj kompanie si person juridik. Akuzat lidhen me veprën penale “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”, sipas Kodit Penal të Republikës së Kosovës.
Ngjarja ndodhi më 7 korrik 2025 në fshatin Gorazhdevc të Komunës së Pejës. Punëtori S.R., i angazhuar vetëm si pastrues, humbi jetën në vendin e punës si pasojë e kontaktit me një gjenerator. Sipas aktakuzës, Sh.K. nuk ka ndërmarrë masat e sigurisë dhe shëndetit në punë, nuk ka krijuar kushte të sigurta, nuk ka ofruar trajnim për siguri, as informacion për rreziqet dhe përdorimin e duhur të makinerisë.
Gjeneratori kishte përçues të këputur dhe të hapur, pa kapak dhe pa tokëzim, duke krijuar rrezik të përhershëm për punëtorët. Kompania Luani Transport akuzohet se nga pakujdesia nuk ka zbatuar Ligjin për Sigurinë dhe Shëndetin në Punë, duke vepruar në kundërshtim me nenin 6, paragrafi 1, dhe rregullat teknike për sigurinë.
Prokurori i shtetit ka propozuar gjykatës, përveç dënimit për veprën penale, edhe dënimin plotësues “Ndalimi i ushtrimit të profesionit, veprimtarisë ose detyrës”, konkretisht ndalimin e veprimtarisë së separacionit. Kjo sepse i pandehuri ka ushtruar veprimtarinë pa licencë dhe pa kriteret e sigurisë në vendin e punës.
Rasti pritet të shqyrtohet nga gjykata kompetente.