Prokuroria Speciale e Republikës së Kosovës (PSRK) ka zyrtarizuar akuzat ndaj Sinisha Spasiqit për krime lufte të kryera gjatë ofensivës në fshatin Reznik të Vushtrrisë. Sipas dosjes së prokurorisë, ngjarjet kanë ndodhur më 4 prill 1999, kur forcat serbe, nën urdhrat e Zoran Kostiqit (tani i dënuar nga shkalla e parë), nisën një aksion të gjerë kundër civilëve shqiptarë.
Sipas aktakuzës, grupi i armatosur, në të cilin bënte pjesë edhe i akuzuari Slagjan Trajkoviq (gjithashtu i dënuar nga shkalla e parë), shfrytëzoi shtëpinë e Shaip Zenelit si shtab operativ. Nga aty, forcat e përfshira plaçkitën dhe dogjën shtëpi të shumta, ndërsa vranë anëtarë të familjes Ujkani (I.U., M.U., B.U., F.U., S.U., T.U. dhe H.U.). Disa prej viktimave u dogjën për së gjalli pas ekzekutimit.
Aktakuza përshkruan gjithashtu dhunën e ushtruar ndaj familjarëve të tjerë. Pasi u plaçkitën 300 DM nga një anëtare e familjes, viktima B.U. u dërgua në katin e dytë të shtëpisë, ku u rrah brutalisht për një orë. Ndërkohë, Sinisha Spasiq akuzohet se ka qëndruar i armatosur te dera e shtëpisë ku mbaheshin të mbyllur Naim dhe Xhevahire Ujkani, duke mos i lejuar ata të dilnin derisa dëgjonin dhunën që ushtrohej mbi të afërmit e tyre.
Sinisha Spasiq akuzohet për veprën penale "Krime lufte kundër popullatës civile", në shkelje të nenit 142 dhe 22 të Kodit Penal të RSFJ-së, si dhe neneve 31 dhe 146 të Kodit Penal të Republikës së Kosovës. Prokuroria ka kërkuar vazhdimin e masës së paraburgimit për të pandehurin, i cili është nën këtë masë prej gushtit të vitit 2025.