Mëngjesin e kësaj të marte, një vatër zjarri është aktivizuar në kodrat e lagjes 15 Tetori në qytetin e Vlorës. Flakët kanë përfshirë një sipërfaqe me pisha dhe shkurre, duke u afruar pranë banesave të zonës.
Sipas të dhënave paraprake, dyshohet se zjarri mund të jetë shkaktuar nga zjarrvënia e qëllimshme për pastrimin e territorit nga barishtet. Megjithatë, prania e erës ka ndihmuar në përhapjen e flakëve, duke shtuar rrezikun për përhapje të mëtejshme.
Forcat zjarrfikëse kanë mbërritur në vendngjarje dhe po punojnë për izolimin dhe shuarjen e plotë të flakëve. Autoritetet kanë konfirmuar se kjo është vatra e dytë e zjarrit që regjistrohet në të njëjtin perimetër gjatë ditëve të fundit.