Një alarm për një objekt të dyshimtë ka vënë në lëvizje autoritetet policore në Tiranë gjatë paradites së kësaj të shtune. Rreth orës 09:15, në kryqëzimin e rrugës së Elbasanit me rrugën “Dervish Hima”, pranë Ambasadës së SHBA-së, u evidentua një objekt që shkaktoi dyshime për një lëndë shpërthyese.
Pas sinjalizimit, shërbimet e Policisë së Shtetit ndërhynë menjëherë duke rrethuar perimetrin e sigurisë dhe duke bllokuar lëvizjen e automjeteve në atë segment rrugor. Në vendin e ngjarjes mbërritën specialistët e forcave xheniere, ekspertët antieksploziv dhe qentë e Gardës së Republikës, të cilët kryen procedurat standarde të verifikimit.
Pas kontrollit, u konfirmua se bëhej fjalë për një kovë plastike brenda së cilës kishte fasule, e cila nuk përbënte asnjë rrezik për sigurinë publike. Pas përfundimit të veprimeve, perimetri i sigurisë u hoq dhe qarkullimi i automjeteve në zonë iu rikthye normalitetit.
Përditësime
Policia e Shtetit konfirmoi se alarmi për bombë pranë Ambasadës së SHBA-së më 30 maj, në orën 09:15, rezultoi i rremë. Incidenti u regjistrua në kryqëzimin e rrugës 'Dervish Hima'. Raportimi u bë nga gazetarët Dorjana Bezat dhe Besar Bajraktaraj.