Për shkak të valës së të nxehtit, e cila parashikohet të sjellë temperatura deri në 39 gradë Celsius, Instituti i Gjeoshkencave ka paralajmëruar rrezik të shtuar për vatra zjarri në pjesën më të madhe të vendit. Qarqet më të ekspozuara janë Lezha, Durrësi, Tirana, Elbasani, Fieri, Berati, Gjirokastra dhe Vlora. Edhe pse në qarqet e tjera rreziku vlerësohet më i ulët, autoritetet theksojnë se në zona të lokalizuara mund të ketë incidente të ngjashme.
Situata në terren
Në qarkun e Fierit, zjarret në fshatrat Riban, Ngraçan dhe Panahor mbeten shqetësuese, ku është raportuar një sipërfaqe prej 180 hektarësh e përfshirë nga flakët. Në Dajt, vijon ndërhyrja në masivin pyjor të Priskës dhe Çakalleshit, ndërsa në qarkun e Elbasanit, vatrat aktive ndodhen në fshatin Shqiponjë, malin e Dardhës dhe në Mjekës. Në Bashkinë e Beratit, është raportuar riaktivizim i zjarrit në fshatin Kostren 2.
Masat e ndërmarra
Agjencia e Mbrojtjes Civile dhe autoritetet vendore kanë bërë me dije se, pavarësisht përmasave të vatrave, banesat dhe komunitetet nuk janë të rrezikuara në zonat ku po operohet. Për izolimin dhe shuarjen e flakëve, operacioni kombëtar përfshin:
• 502 forca operacionale në terren
• 110 efektivë të Forcave të Armatosura
• 54 automjete zjarrfikëse
• 3 helikopterë dhe avioni special Air Tractor
Në disa prej këtyre vatrave, si në Shqiponjë dhe në malin e Dardhës, autoritetet kanë njoftuar se zjarret janë vënë nën kontroll ose janë izoluar.
Përditësime
Autoritetet raportuan përmirësim të situatës në tetë qarqe. Forcat operacionale shuan plotësisht vatrat në Dajt, Priskë, Kostren 2 dhe Uruç. Flakët janë vënë nën kontroll në Çikallesh (Kavajë), Mallakastër dhe Plan të Bardhë (Klos). Pavarësisht progresit, Agjencia e Mbrojtjes Civile njoftoi se po punohet për neutralizimin e një vatre të re në Alikomemaj (Memaliaj).