Trajneri i Kombëtares U-21 të Shqipërisë, Alban Bushi, ka dhënë një prononcim për fshf.org në prag të ndeshjes miqësore kundër Uzbekistanit, e cila do të zhvillohet nesër në orën 14:30 në Antalia të Turqisë. Kjo sfidë bën pjesë në përgatitjet për Evropianin U-21, ku Shqipëria është një nga vendet organizatore.
Bushi u ndal te periudha e gjatë përgatitore në këtë grumbullim, hera e parë që skuadra stërvitet kaq ditë për një ndeshje të vetme. Kjo ka mundësuar punë më të qartë në aspektin taktik dhe përmirësim të bashkëpunimit mes lojtarëve.
Ai vlerësoi grupin e mirë dhe ardhjen e lojtarëve të rinj për herë të parë nga jashtë: Asani, Gojani dhe Dibrani. Këta lojtarë cilësorë janë përshtatur mirë me grupin. "Do të kemi ide shumë të qarta, do të jemi shumë të saktë në ndeshjen me Uzbekistanit, sepse e njohim mirë njëri-tjetrin dhe kanë kuptuar qartë skemat, taktikat dhe idetë tona", u shpreh Bushi.
Sa i përket kundërshtarit, trajneri e cilësoi Uzbekistanin ekip të mirë që meriton vlerësim dhe respekt. Skuadra shqiptare e ka parë ndeshjen e tyre pardje kundër Rusisë në Antalia, ku u mundën 2-1, por mbetën në lojë gjatë gjithë kohës dhe barazuan 1-1. "Nuk diskutohet që ne jemi favoritë, do ta kemi lojën në kontroll. Do të zbatojmë atë që kemi punuar në stërvitje dhe jam i sigurt për sukses", përfundoi Alban Bushi.