Qendërmbrojtësi i Kombëtares së Kosovës, Albian Hajdari, ka njoftuar largimin e tij nga grumbullimi i ekipit për shkak të një lëndimi. Nëpërmjet një postimi në rrjetin social Instagram, futbollisti ka shprehur keqardhje për pamundësinë e tij për të kontribuar në ndeshjet e radhës të Dardanëve.
Hajdari theksoi se lëndimi fizik shoqërohet edhe me vështirësi emocionale, pasi nuk do të mund të jetë në fushë përkrah bashkëlojtarëve. "Sot më dhemb jo vetëm lëndimi, por edhe mendimi se nuk do të jem në fushë me Kosovën në ndeshjet e ardhshme. Për fat të keq, duhet të kthehem në Gjermani për t’u rikuperuar", shkroi mbrojtësi.
Futbollisti mungoi në ndeshjen e kaluar ndaj Austrisë dhe tashmë është konfirmuar se nuk do të jetë i gatshëm as për përballjen e radhës ndaj Izraelit, e cila zhvillohet të enjten në Debrecen të Hungarisë, si dhe për ndeshjen e kthimit ndaj Austrisë të dielën. Pavarësisht mungesës, Hajdari shprehu krenarinë për karakterin e treguar nga skuadra dhe shtoi se do ta mbështesë ekipin nga larg.