Kryeministri në detyrë i Republikës së Kosovës, Albin Kurti, priti sot në ndërtesën e Qeverisë kryetarin e Bashkisë Metropolitane të Izmirit, Dr. Cemil Tugay, i cili ishte i shoqëruar nga bashkëpunëtorët e tij. Ky takim shënon vazhdimësinë e një komunikimi të vendosur dy vjet më parë, kur të dy zyrtarët u takuan për herë të parë në zyrën e kryebashkiakut në Izmir.
Në qendër të bisedimeve ishte forcimi i lidhjeve ndërmjet Kosovës dhe qytetit të Izmirit përmes projekteve konkrete. Palët shqyrtuan mundësitë për rritjen e shkëmbimit tregtar dhe thithjen e investimeve në një sërë sektorësh strategjikë, duke përfshirë:
- Ekonomi, industri dhe ndërmarrësi
- Arsim, kulturë, teknologji dhe inovacion
- Bujqësi, mjedis dhe energji
Një vëmendje e posaçme iu kushtua shkëmbimit të përvojave institucionale, me theks të veçantë te menaxhimi i mbeturinave, mbrojtja e mjedisit dhe fusha e shëndetësisë. Kryeministri Kurti vlerësoi se marrëdhëniet ndërmjet Kosovës dhe Turqisë janë të shkëlqyera, duke shtuar se lidhja me Izmirin mbart një dimension historik dhe njerëzor, pasi ky qytet u shndërrua në strehë për shumë shqiptarë të dëbuar nga dhuna dhe terrori i Serbisë dhe Jugosllavisë gjatë shekullit të kaluar. Ai theksoi se bashkatdhetarët tanë në Izmir janë pjesë e vlerësuar e shoqërisë atje, ndonëse mbajnë të gjallë lidhjen me origjinën e tyre.