Kryeministri në detyrë, Albin Kurti, priti në takim drejtoren për Zgjerim dhe Fqinjësi të Bashkimit Evropian për Ballkanin Perëndimor, Valentina Superti, në vizitën e saj të parë në Republikën e Kosovës. Gjatë takimit, Kurti kërkoi avancimin e pozitës së Kosovës drejt integrimit evropian, duke theksuar se vullnetit të popullit për anëtarësim, Bashkimi Evropian duhet t’i përgjigjet përmes dhënies së statusit të vendit kandidat dhe hapjes së negociatave.
Kurti vlerësoi se Kosova është shndërruar në një demokraci gjithëpërfshirëse dhe lider rajonale në fushën e sundimit të ligjit, luftës kundër korrupsionit, të drejtave politike dhe lirive civile. Ai gjithashtu nënvizoi se, për herë të parë pas 15 vjetësh, Banka Botërore dhe Fondi Monetar Ndërkombëtar e kanë larguar Kosovën nga listat e vendeve të brishta.
Diskutimet u fokusuan edhe në aspekte të tjera të bashkëpunimit, si:
• Plani i Rritjes dhe zhvillimi ekonomik;
• Integrimi në zonën “Roam Like at Home”;
• Zbatimi i marrëveshjeve të Procesit të Berlinit;
• Bashkëpunimi rajonal, përfaqësimi i barabartë, infrastruktura, infrastruktura, tregtia, digjitalizimi dhe arsimi.
Kryeministri në detyrë nënvizoi rëndësinë e zbatimit të marrëveshjeve të arritura në kuadër të Procesit të Berlinit, duke vënë theksin te marrëveshja e lëvizjes së lirë me letërnjoftime dhe ajo për njohjen e diplomave, çështje për të cilat kërkohet angazhim i mëtejshëm nga vendet e rajonit.