Kryeministri në detyrë i Republikës së Kosovës, Albin Kurti, priti në takim deputeten me origjinë shqiptare në Parlamentin e Kantonit të Bernës në Zvicër, Shasime Osmani, e cila është zgjedhur nga radhët e Partisë Socialdemokrate (SP). Gjatë këtij takimi, Kurti e uroi Osmanin për marrjen e detyrës së re, duke e cilësuar atë si një zë avokues për edukimin dhe drejtësinë sociale.
Një pjesë e rëndësishme e bisedës ishte shkëmbimi i përvojave mbi sistemin dual të arsimit, një model që po zbatohet aktualisht edhe në Kosovë. Palët vlerësuan rëndësinë e këtij sistemi për zhvillimin e aftësive profesionale. Diskutimet u përqendruan gjithashtu te barazia e mundësive, roli i gruas në proceset vendimmarrëse dhe rritja e përfshirjes së mërgatës shqiptare në jetën politike e shoqërore të shtetit zviceran.
Kryeministri Kurti theksoi se angazhimi i mërgatës në institucionet publike të vendeve mikpritëse është tregues i kontributit të vazhdueshëm të komunitetit shqiptar. Në përfundim, palët rikonfirmuan nevojën për thellimin e mëtejshëm të bashkëpunimit ndërmjet Kosovës dhe Zvicrës në fusha me interes të ndërsjellë. Kurti e vlerësoi rrugëtimin politik të znj. Osmani si një shembull frymëzues për të rinjtë dhe për gjithë komunitetin shqiptar në diasporë.