Dimal Basha, ministër i Infrastrukturës dhe Transportit, deklaroi se kryeministri Albin Kurti i kishte ofruar presidentes Vjosa Osmani një rol në qeveri.
Në emisionin Debat Plus të TV Dukagjini, Basha tha se Kurti kishte propozuar që Osmani të bëhej zëvendëskryeministre e parë e Kosovës dhe njëkohësisht të merrte drejtimin e Ministrisë së Punëve të Jashtme. Ai shpjegoi se kjo ofertë ishte bërë për të gjetur një figurë konsensuale në tejkalimin e krizës politike.
"Për shkak të bashkëpunimit që kemi pasur me krejt ato mosmarrëveshjet e vogla. Kryeministri i ka thënë presidentes: e gjejmë një figurë konsensuale për ta tejkaluar krizën. Edhe hajde bëhu zëvendëskryeministrja e parë e Kosovës dhe ia ka ofruar Ministrinë e Punëve të Jashtme. Presidentja është marrë me politikën e jashtme, që është një prej vërejtjeve që i ka pas. Por kryeministri e dëshmon të kundërtën, kur i thotë: a ka mundësi hajde me mua, njeriu i dytë. D.m.th. është Albin Kurti dhe Vjosa Osmani", tha Basha.
Basha kritikoi gjithashtu Partinë Demokratike të Kosovës (PDK) për mungesë propozimesh konkrete në procesin e zgjedhjes së presidentit. Ai vlerësoi se PDK-ja kishte pasur mundësinë të vendoste në pozitë të vështirë partitë e tjera, nëse do të kishte propozuar kandidatë të pranueshëm.
"PDK-ja ka mund me na vendos në pozitë të keqe krejtve: edhe juve, edhe neve si LVV, edhe LDK-në. Edhe kish dalë se ku i kam dy emrat të denjë. Burra e gra, këta janë dy emrat dhe ju s’mundemi me refuzu. Edhe atëherë kishim thënë: vërtetë këta qenkan të denjë dhe figura që gëzojnë mbështetje gjithëpopullore po edhe brenda Kuvendit. Dhe ne i mbështesim. Por meqenëse nuk kanë qenë kaq të denjë, pse nuk e kanë dhënë asnjë emër? Asnjë emër të vetëm", u shpreh Basha.