Ish-presidentja Vjosa Osmani iu përgjigj deklaratave të kryeministrit në detyrë Albin Kurti, i cili e ka akuzuar për ambicie politike. Osmani sqaroi se roli i presidencës nuk lidhet me pushtetin ekzekutiv, por me ruajtjen e ekuilibrit institucional dhe funksionimin demokratik të shtetit.
Ajo theksoi se presidenca është shtylla që mban balancën mes pushteteve të tjera dhe ndërhyn kur është e nevojshme për të korrigjuar gabime institucionale. “Institucioni i presidencës nuk do pushtet. Është shtylla që e mban balancën e pushteteve të tjera, e ruan demokracinë në kohë të rënda dhe siguron që kur të tjerët bëjnë gabime, ato të përmirësohen”, tha Osmani.
Osmani shtoi se, nëse do të kishte dashur pushtet, do të kishte garuar për postin e kryeministres. “Nëse do të doja pushtet, do të kandidoja për kryeministre. Jam e bindur që ka qenë vullnet i popullit që unë të jem presidente”, u shpreh ajo.
Ajo kujtoi se ka marrë pjesë në hartimin e Kushtetutës dhe se interpretimi i saj i takon Gjykatës Kushtetuese. Osmani përmendi se pas zgjedhjeve historike, Albin Kurti ka dy zgjidhje: një presidencë që e çon shtetin përpara ose krizë me zgjedhje të njëpasnjëshme.
Përditësime
Presidentja Vjosa Osmani tha se Kryeministri Albin Kurti nuk është autoritet për interpretimin e Kushtetutës. Vetëm Gjykata Kushtetuese ka këtë rol, dhe ajo e di mirë pasi ka marrë pjesë në hartimin e saj.