Kryeministri i Kosovës, Albin Kurti, ka uruar Shtetet e Bashkuara të Amerikës për **për 250-vjetorin e shpalljes së Pavarësisë, duke vënë theksin te vlerat universale të lirisë, barazisë dhe të drejtave të njeriut që përçoi Deklarata e 4 korrikut 1776. Në mesazhin e tij, Kurti e përshkroi këtë dokument si një themel që ka frymëzuar popujt në mbarë botën, përfshirë kombin shqiptar.
Kurti theksoi rëndësinë e mbështetjes amerikane në dy momente kyçe për shqiptarët gjatë një shekulli. Së pari, ai kujtoi takimin e Fan Nolit me presidentin Woodrow Wilson më 4 korrik 1918, ku përmes “14 pikave të Wilsonit” u ndikua në ruajtjen e shtetit shqiptar pas Luftës së Parë Botërore. Së dyti, kreu i qeverisë përmendi mbështetjen për pavarësinë e Kosovës, duke nënvizuar deklaratën e ish-presidentit George W. Bush në Tiranë, më 10 qershor 2007, si një nga momentet më të rëndësishme në historinë moderne shtetformuese.
Sipas Kurtit, këto ngjarje dëshmojnë një aleancë të fortë dhe një partneritet të qëndrueshëm ndërmjet Kosovës dhe SHBA-së. Për nder të këtij përvjetori, Posta e Kosovës ka prezantuar gjithashtu një pullë postare si simbol të miqësisë midis dy vendeve.