Kryetarja e Kuvendit të Kosovës, Albulena Haxhiu, ka pritur sot përfaqësuesit e platformës qytetare Liria ka Emër, Eliza Hoxha, Ismail Tasholli dhe Ridvan Emini.
Në takim u diskutua për marshin qytetar "Drejtësi, jo politikë", i cili do të zhvillohet nesër, më 17 shkurt, në Prishtinë. Marshi synon mbrojtjen e çlirimtarëve Hashim Thaçi, Kadri Veseli, Jakup Krasniqi, Rexhep Selimi dhe shokëve të tyre, të cilët po gjykohen në Hagë, si dhe rëndësinë e një mobilizimi dinjitoz në këtë fazë vendimtare të procesit.
Eliza Hoxha theksoi se marshimi është shprehje e ndërgjegjes qytetare dhe e unitetit përtej dallimeve politike. “Ky marsh është zë i qytetarëve për drejtësi dhe dinjitet. Është moment kur shoqëria jonë tregon se di të bashkohet për çështje që e tejkalojnë politikën”, u shpreh ajo.
Ismail Tasholli nënvizoi se pjesëmarrja masive do të jetë mesazh i qartë për respektimin e së vërtetës dhe të drejtësisë. “Nesër, Prishtina do të jetë zëri i qytetarëve që kërkojnë drejtësi të paanshme dhe mbrojtje të vlerave të luftës çlirimtare”, tha ai.
Albulena Haxhiu vlerësoi angazhimin e platformës dhe rëndësinë e mobilizimit qytetar. “Ju përgëzoj për angazhimin dhe mobilizimin qytetar. Do të jetë një marsh madhështor, sepse kur bëhet fjalë për vlerat e luftës çlirimtare, UÇK-ja na bashkon të gjithëve”, deklaroi ajo.
Platforma Liria ka Emër falënderoi kryetaren e Kuvendit për pritjen dhe diskutimin konstruktiv, duke ritheksuar thirrjen për qytetarët të bashkohen nesër në marsh.