Ushtruesja e detyrës së Presidentes së Republikës së Kosovës, Albulena Haxhiu, ka pritur sot në një takim lamtumirës ambasadorin e Suedisë në Kosovë, Jonas Westerlund, me rastin e përfundimit të detyrës së tij diplomatike në vend.
Gjatë takimit, Haxhiu vlerësoi mbështetjen e vazhdueshme që shteti suedez i ka ofruar Kosovës ndër vite. Ajo shprehu mirënjohje për angazhimin, përkushtimin dhe kontributin e ambasadorit Westerlund në forcimin e marrëdhënieve ndërmjet dy shteteve, si dhe për bashkëpunimin e ngushtë të ndërtuar gjatë periudhës së mandatit të tij.
Përmes një postimi në rrjetin social "Facebook", Haxhiu njoftoi se i ka uruar ambasadorit suksese në angazhimet e ardhshme profesionale. Ajo theksoi bindjen e saj se miqësia dhe partneriteti ndërmjet Kosovës dhe Suedisë do të vazhdojnë të thellohen dhe të forcohen edhe në të ardhmen.