Zëvendëskryeministri i parë dhe ministri i Punëve të Jashtme dhe Diasporës në detyrë, Glauk Konjufca, ka pritur në një takim lamtumirës ambasadorin e Mbretërisë së Suedisë në Kosovë, Jonas Westerlund.
Gjatë këtij takimi, Konjufca e ka falënderuar ambasadorin Westerlund për angazhimin dhe kontributin e tij gjatë mandatit diplomatik, si dhe për rolin në forcimin e marrëdhënieve midis Republikës së Kosovës dhe Mbretërisë së Suedisë. Ai ka vlerësuar lart mbështetjen e vazhdueshme që Suedia ka ofruar për zhvillimin e vendit në sektorë të rëndësishëm.
Diskutimi është përqendruar në rëndësinë e vazhdimit të partneritetit ndërmjet dy shteteve. Ministri në detyrë ka nënvizuar nevojën për vijimin e bashkëpunimit, veçanërisht në kuadër të perspektivës evropiane të Kosovës, si dhe për zgjerimin e raporteve ekonomike. Në përmbyllje të takimit, Konjufca i ka uruar ambasadorit Westerlund suksese në angazhimet e tij të ardhshme diplomatike.