Zëvendëskryeministri i parë dhe ministri i Punëve të Jashtme dhe Diasporës, Glauk Konjufca, ka pritur në një takim njoftues ambasadorin e ri të Mbretërisë së Belgjikës në Republikën e Kosovës, Arnaud Dusaucy. Ky takim shënoi fillimin e mandatit diplomatik të ambasadorit Dusaucy, të cilit Konjufca i uroi suksese në ushtrimin e detyrës së tij.
Sipas njoftimit të Ministrisë së Punëve të Jashtme dhe Diasporës, gjatë takimit u vlerësuan marrëdhëniet dypalëshe ndërmjet dy vendeve, duke theksuar mbështetjen e vazhdueshme që Belgjika i ka ofruar Kosovës. Diskutimet u përqendruan në forcimin e mëtejshëm të bashkëpunimit bilateral, me theks të veçantë në dimensionin politik dhe ekonomik.
Një pjesë e rëndësishme e bisedës iu kushtua avancimit të Kosovës në proceset e integrimit evropian dhe euroatlantik. Palët shqyrtuan mundësitë për thellimin e bashkëpunimit në këto drejtime, duke konfirmuar angazhimin e dyanshëm për intensifikimin e marrëdhënieve diplomatike.