Ushtruesja e detyrës së Presidentes së Republikës së Kosovës, Albulena Haxhiu, zhvilloi një takim me Kryeministrin e Çekisë, Andrej Babiš, në margjinat e Samitit BE-Ballkani Perëndimor që u mbajt në Tivat.
Gjatë takimit, Haxhiu shprehu mirënjohjen për mbështetjen e vazhdueshme të Çekisë ndaj Kosovës në proceset e shtetndërtimit dhe ato euroatlantike. Ajo vlerësoi marrëdhëniet dypalëshe, duke theksuar se avancimi i përfaqësimit diplomatik me ambasadorë të plotë pasqyron besimin e ndërsjellë ndërmjet dy vendeve.
Diskutimet u fokusuan në rrugën evropiane të Kosovës. Haxhiu kërkoi mbështetjen çeke për hapat integrues, përfshirë dërgimin e Pyetësorit të Komisionit Evropian dhe përparimin drejt statusit të vendit kandidat për anëtarësim në Bashkimin Evropian.
Palët shqyrtuan gjithashtu mundësitë për intensifikimin e bashkëpunimit ekonomik. Sipas Presidencës, fushat me interes të përbashkët për zhvillim janë:
• Energjia;
• Teknologjia e gjelbër dhe inovacioni;
• Digjitalizimi;
• Shëndetësia;
• Infrastruktura dhe industria e avancuar.
Në përfundim, Haxhiu rikonfirmoi përkushtimin e Kosovës për thellimin e marrëdhënieve me Çekinë, duke falënderuar shtetin çek për kontributin e vazhdueshëm në kuadër të KFOR-it për ruajtjen e paqes dhe stabilitetit në rajon.