Ministri për Evropën dhe Punët e Jashtme, Ferit Hoxha, priti më 29 prill në Tiranë të Dërguarën e Posaçme të Republikës Çeke për Ballkanin Perëndimor, Editën Hrdá.
Gjatë takimit u rikonfirmua angazhimi i përbashkët i Shqipërisë dhe Çekisë për zgjerimin e Bashkimit Evropian në Ballkanin Perëndimor, të cilin e cilësuan si investim strategjik për paqen, stabilitetin dhe prosperitetin në rajon.
Hoxha shkroi në rrjetet sociale se takimi përbënte një shkëmbim të shkëlqyer mendimesh me Hrdá-n, të cilën e quajti mike dhe ish-kolege nga periudha në OKB në Nju Jork dhe në Bruksel. Ministri nënvizoi se Shqipëria mbetet e palëkundur në rrugën drejt anëtarësimit në BE, me përparim të dukshëm dhe ritëm të fortë reformash.
Palët vlerësuan mbështetjen e vazhdueshme të Republikës Çeke për një proces zgjerimi të besueshëm dhe të bazuar në meritë, si dhe rëndësinë e mbajtjes së Ballkanit Perëndimor në fokus të agjendës së Bashkimit Evropian.