Ushtruesja e detyrës së presidentes së Kosovës, Albulena Haxhiu, ka zhvilluar një takim zyrtar me përfaqësuesit e organizatës "Albanians for America", Gino Mulliqi dhe Gëzim Rushiti. Në njoftimin e bërë nga Presidenca e Republikës së Kosovës, theksohet se takimi është përqendruar te marrëdhëniet e veçanta ndërmjet Kosovës dhe Shteteve të Bashkuara të Amerikës, si dhe te roli jetik që luan komuniteti shqiptaro-amerikan në ruajtjen dhe forcimin e tyre.
Albulena Haxhiu, e cila aktualisht mban edhe detyrën e kryetares së Kuvendit të Kosovës, ka vlerësuar kontributin shumëvjeçar të këtij komuniteti në përfaqësimin e interesave të vendit në Kongresin amerikan, në administratën e Shteteve të Bashkuara dhe në debatin publik. Sipas Haxhiut, historia e marrëdhënieve ndërshtetërore nuk mund të kuptohet pa angazhimin e vazhdueshëm të mërgatës, e cila ka ndihmuar në krijimin e mbështetjes përtej ndarjeve partiake në Amerikë.
"Historia e marrëdhënies së Kosovës me Shtetet e Bashkuara nuk mund të shkruhet pa kontributin e komunitetit shqiptaro-amerikan. Për dekada, ky komunitet e ka mbajtur çështjen e Kosovës të pranishme në institucionet amerikane, duke krijuar miqësi dhe mbështetje. Kjo trashëgimi mbetet një nga shtyllat më të rëndësishme të lidhjes sonë me Amerikën", citohet të ketë thënë Haxhiu.
Gjatë takimit, Haxhiu ka shprehur falënderimet e saj për përfaqësuesit e organizatës "Albanians for America", duke inkurajuar fuqizimin e mëtejshëm të zërit të shqiptarëve në Shtetet e Bashkuara dhe mbrojtjen e vazhdueshme të interesave shtetërore të Kosovës.