Ushtruesja e detyrës së Presidentes së Republikës së Kosovës, Albulena Haxhiu, ka dekoruar kolonelin amerikan A. J. Berg me Medaljen Presidenciale Ushtarake. Ceremonia e nderimit është zhvilluar me rastin e përfundimit të mandatit të kolonelit Berg si Atashe i Mbrojtjes i Shteteve të Bashkuara të Amerikës në Kosovë.
Gjatë këtij takimi, Haxhiu vlerësoi kontributin e jashtëzakonshëm të kolonelit në forcimin e partneritetit strategjik dhe bashkëpunimit ushtarak ndërmjet Kosovës dhe ShBA-së.
Sipas njoftimit zyrtar, angazhimi i Berg është përqendruar në:
- Mbështetjen e zhvillimit dhe modernizimit të Forcës së Sigurisë së Kosovës (FSK);
- Avancimin e bashkëpunimit ndërinstitucional;
- Thellimin e marrëdhënieve dypalëshe në fushën e mbrojtjes.